ენების ევროპული დღისადმი მიძღვნილი კვირეული CEA-ში

თანამედროვე განათლების აკადემიაში ენების ევროპული დღისადმი მიძღვნილი კვირეული გაიმართა, რომლის ფარგლებშიც მოსწავლეები სხვადასხვა სახის აქტივობაში ჩაერთნენ. კვირეული მოიცავდა სახალისო კონკურსებსა და თამაშებს, შემეცნებით-საგანმანათლებლო თუ გასართობ ღონისძიებებს. მოსწავლეებს შესაძლებლობა ჰქონდათ უკეთ გასცნობოდნენ ევროპაში მცხოვრები სხვადასხვა ხალხის კულტურულ თუ ენობრივ თავისებურებებს.

ენების ევროპული დღისადმი მიძღვნილი კვირეული აკადემიაში უცხოური ენების კათედრის ხელმძღვანელის მანანა ჭყონიას ორგანიზებით გაიმართა. კვირეულში ჩართულები იყვნენ ინგლისური, ფრანგული, იტალიური და გერმანული ენების მასწავლებლები. აქტივობები აკადემიის IV- XI კლასებში განხორციელდა. აქტივობებში მონაწილე მოსწავლეებს ევროპის საბჭოსგან სიმბოლური საჩუქრები გადაეცემათ.

ენების ევროპული დღისადმი მიძღვნილი კვირეული, ევროპის კულტურულ ინსტიტუტთა გაერთიანების EUNIC-ის (European Union National Institutes for Culture) საქართველოს წარმომადგენლობის ეგიდით, სკოლებში მთელი ქვეყნის მასშტაბით ჩატარდა. ენების ევროპული დღე საქართველოში 2012 წლიდან, ყოველ სექტემბერს აღინიშნება.