როდის უნდა აღინიშნებოდეს შობა? - X კლასელების დებატები

თანამედროვე განათლების აკადემია - Contemporary Education Academy CEA-ში საახალწლო თემატიკაზე დებატები გაიმართა, რომელშიც მონაწილეობა დებატების კლუბის წევრებმა მიიღეს. სადისკუსიო თემად ქვეყანაში აქტუალური საკითხი შეირჩა: როდის უნდა აღინიშნებოდეს საქართველოში შობის დღესასწაული - 25 დეკემბერს თუ 7 იანვარს? მოსწავლეებმა კარლ პოპერის ფორმატში წარმოადგინეს თავიანთი არგუმენტები, სადაც გამოიკვეთა, როგორც ისტორიული და კულტურული, ასევე თანამედროვე საზოგადოების განვითარებასთან დაკავშირებული საკითხები.

დებატებში მონაწილეობა მე-10 კლასის მოსწავლეებმა მიიღეს. მტკიცებითი გუნდის წევრებმა, ელიზაბეთ ფერბენქსმა, მარიამ რურუამ და ზურა ლურსმანაშვილმა, წარმატებით დაიცვეს შობის დღესასწაულის 7 იანვარს აღნიშვნის მართებულობა. გუნდის წევრებმა თავიანთ არგუმენტებში ხაზი გაუსვეს ტრადიციის მნიშვნელობას, ისტორიულ და რელიგიურ საფუძვლებს, რამაც მსჯელობის პროცესი კიდევ უფრო საინტერესო და შთამბეჭდავი გახადა.

უარმყოფელმა გუნდმა, რომელსაც წარმოადგენდნენ ელენე ჯღარკავა, მართა შალამბერიძე და თინათინ ძაპტაშვილი, აქტიურად დაიცვა მოსაზრება, რომ შობის დღესასწაული 25 დეკემბერს უნდა აღინიშნებოდეს. თავიანთი მოსაზრების დასაცავად, მათ საინტერესო არგუმენტები გამოიყენეს.

სპიკერებმა მაღალი დონის ანალიტიკური და კრიტიკული აზროვნების უნარი გამოავლინეს. მათ წარმატებით გაართვეს თავი კონტრარგუმენტების წარმოდგენას და სპონტანური კითხვა-პასუხის სესიას. განსაკუთრებით აღსანიშნავია მონაწილეების მიერ წარმოდგენილი ფაქტობრივი მასალის სიმდიდრე და მათი უნარი, დაეკავშირებინათ ეს საკითხი თანამედროვე გლობალურ კონტექსტთან.

ჟიურიმ, რომლის წევრი და მსაჯი იყო მე-10 კლასის მოსწავლე, ნიკოლოზ აბულაძე, გამარჯვებულად მტკიცებითი გუნდი დაასახელა. აქტივობას მე-8 ა, მე-9 ბ და მე-9 დ კლასის მოსწავლეები დაესწრნენ.

დებატები აკადემიის სამოქალაქო განათლების მასწავლებლის მარიამ დანელიას ინიციატივითა და ხელმძღვანელობით გაიმართა.